Ikipe ya Rayon Sports FC yanditse amateka mashya nyuma yo kugera ku mukino wa nyuma (Final) wa CECAFA Kagame Cup 2026, isezereye Jamus SC yo muri Sudani y'Epfo ku ntsinzi y'ibitego 3-1.
Ni inshuro ya mbere mu myaka 28 Rayon Sports igeze ku mukino wa nyuma w'iri rushanwa, nyuma y'uko iherukaga kuwugeraho mu 1998, ari na bwo yegukanye igikombe cya CECAFA.
Mu mukino wa ½ wabereye kuri Kigali Pelé Stadium, Rayon Sports yatangiye isatira bikomeye maze ku munota wa 17, Akbar Muderi afungura amazamu atsinda igitego cya mbere, nyuma yo guca mu rihumye ba myugariro ba Jamus SC.
Mu gice cya kabiri, ku munota wa 59, Ibrahim Mansouru Djingarey yatsinze igitego cya kabiri, ashimangira ubwiganze bwa Gikundiro imbere y'imbaga y'abafana bari buzuye stade.
Jamus SC yagerageje kwigaranzura umukino, maze ku munota wa 70 umusimbura Diallo Bandiougou atsindira iyi kipe igitego cyo kwishyura kimwe, ibintu byongeye guha icyizere abakinnyi bayo.
Icyakora, Rayon Sports ntiyacitse intege. Ku munota wa 88, undi musimbura Gloire Ngongo Tambwe yatsinze igitego cya gatatu, ashyira akadomo ku ntsinzi ya Gikundiro yatumye ibona itike yo gukina umukino wa nyuma.
Nyuma y'umukino, umutoza wa Rayon Sports, Francis Haringingo, yavuze ko yishimiye uburyo ikipe ye yitwaye, ashimangira ko intego yabo itakiri ukugera ku mukino wa nyuma gusa, ahubwo ari no kwegukana igikombe.
Rayon Sports izahurira ku mukino wa nyuma na Gor Mahia FC yo muri Kenya, yasezereye Al Hilal SC ya Sudani kuri penaliti nyuma yo kunganya 1-1 mu minota isanzwe n'iy'inyongera.
