Mu rwego rwo kunoza imigendere myiza y’imodoka mu mujyi wa Kigali hashyizweho uburyo bushya bwo kugenzura imodoka buzwi nka Yellow Box Junction.
Mu rwego rwo kunoza imigendekere y’ibinyabiziga no kugabanya umuvundo mu mijyi, hashyizweho uburyo buzwi nka Yellow Box, ni agace k’umuhanda kagaragazwa n’imirongo y’umuhondo inyuranamo, cyane cyane mu masangano y’imihanda.
Iyi mirongo igira uruhare runini mu gutuma imodoka zitaburira hagati mu masangano, ibintu bikunze guteza umuvundo n’akajagari mu muhanda. Amategeko ayigenga arasobanutse: umushoferi ntiyemerewe kwinjira muri yellow box igihe imbere hari izindi modoka zihagaze zituma atabasha gukomeza. Bisobanuye ko winjira muri aka gace gusa igihe uzi neza ko hari umwanya uhagije wo gukomeza utarinze guhagarara hagati.
Nanone kandi, ntibyemewe guhagarara muri yellow box keretse gusa mu gihe ugiye guhindukira ibumoso (left turn) kandi utegereje ko izindi modoka zikunyuraho. Ibi bikorwa mu rwego rwo kwirinda kubangamira abandi bakoresha umuhanda.
Kutubahiriza aya mategeko bifatwa nk’icyaha cyo mu muhanda, gishobora gutuma umushoferi acibwa amande. Ibi byashyizweho mu rwego rwo gukangurira abashoferi kubahiriza amategeko no kurinda umutekano wo mu muhanda.
Akamaro ka yellow box karagaragara cyane cyane mu mijyi nka Kigali, aho usanga hari urujya n’uruza rwinshi rw’ibinyabiziga. Iyi gahunda ifasha kugabanya ubucucike, koroshya ingendo no gutuma buri wese agera aho ajya mu gihe gito.
Muri rusange, yellow box ni kimwe mu bisubizo by’ingenzi mu kunoza imikoreshereze y’imihanda. Iyo abashoferi bose bayubahirije, bigira uruhare mu kugabanya impanuka, kunoza umutekano no gutuma umujyi ugenda neza.
Ese wowe wari usanzwe uzi amategeko ya yellow box? Utekereza ko azafasha kugabanya umuvundo mu mihanda? Twandikire kuri Lazizi News.
Comments
0