U Rwanda rumaze kugira abakinnyi benshi bakina hanze y’u Rwanda, muri shampiyona zikomeye muri Afurika no hanze yawo, ariko abatoza b’abanyarwanda bo baracyari bacye.
Umutoza wa Dodoma Jiji Mashami Vicent arimo gutoza.
Duhere ku mutoza Mashami Vincent utoza Dodoma Jiji FC yo muri Tanzania yaraye itsinzwe na KMC nyuma yo kubona umwanya wa Kane muri CECAFA KAGAME CUP 2025.
Dodoma Jiji yatsinzwe na KMC FC igitego 1-0 ku mukino w’umunsi wa mbere wa Tanzania NBC Premier League 2025-2026.
Mugisha Bonheur akomeje kwigaragariza Nabil Kouki Umutoza wa Al Masry.
Naho ku bakinnyi bakina hanze harimo Mugisha Bonheur, umukinnyi wo hagati w’ikipe y’igihugu y’ u Rwanda, nyuma yo gufasha Amavubi kwitwara neza imbere ya Zimbabwe yanafashije Al Masry yo mu Misiri gutsinda ikipe ya Ghazl Al Mahala ibitego 2-1.
Ku munsi wa 7 wa shampiyona y’igihugu cya Misiri Egyptian Primier League, Al Masry niyo iyoboye iyi shampiyona n’amanota 14, irusha Zamalek inota 1 ariko yo imaze gukina imikino 6. Uyu mukinnyi akaba yakinnye iminota 90.
Ntwali Fiacre akomeje kwirengagizwa na Nasreddine Nabi.
Naho muri Afurika Yepfo Premiership yarakomeza ku munsi wa 6. Kaiser Chiefs ikinamo umunyezamu w’ikipe y’igihugu Ntwali Fiacre yatsindwaga na Sekhukhune United ibitego 3-1, gusa si byiza kuri uyu mukinnyi kuko akomeje kwicara ku ntebe y’abasimbura dore ko umutoza w’umunya Tunisia Mohamed Nasreddine Nabi abanzamo Brandon Peterson, gusa nk’uko biri kuvugwa ko uyu mutoza yaba yatandukanye na Chiefs byafasha Ntwali kwereka umutoza mushya icyo ashoboye.
Hakim Sahabo na Samuel Guerette bakina mu Bubiligi bakomeje kubona umwanya mucye wo gukina.
Abakina ku mugabane w’iburayi mu gihugu cy’ububirigi shampiyona yarakomezaga. Jupiler Pro League yakomezaga ku munsi wayo wa 7 wasize Standard Liege igiye ku mwanya wa 12 nyuma yo gutsindwa igitego 1-0 na OH Leuven, gusa Hakim Sahabo yinjiye mu kibuga ku munota wa 75 akina iminota 15 gusa.
Ni mugihe Samuel Guerette nawe ukina mu Bubiligi, ikipe ya Raal La Louviere iherutse ku mwongerera amasezerano, yatsinze Club Brugge igitego 1-0, uyu mukinnyi akaba yarinjiye mu kibuga ku munota wa 84 asimbuye Umurundi Jordi Liongola, Nyuma y’iyo ntsinzi ikomeye, Raal La Louvière ubu iri ku mwanya wa 14 n’amanota 7 mu mikino 7 imaze gukina.
Shampiyona y’igihugu ya Tunisia Ligue 1 igeze ku munsi wa 6 baraye bakinnye aho Zarzis ikinamo rutahizamu w’ikipe y’igihugu Nshuti Innocent yatsinzwe na US Monastir igitego 1-0, gusa uyu mukinnyi yabonye iminota yo gukina, mu mikino 6 Zarzis imaze gukina iri ku mwanya wa 2 n’amanota 13, ikaba irushwa inota 1 na Stade Tunisien iri ku mwanya wa mbere.
Tukiri muri iyi shampiyona, Olympic de Beja ikinamo Ishimwe Anicet yatsinzwe na Stade Tunisien ibitego 2-1, gusa uyu musore ntiyigeze yifashishwa n’umutoza w’iyi kipe, Olympic de Beja ikaba iri ku mwanya wa nyuma ku rutonde rwa rw’agateganyo rwa shampiyona y’igihugu ya Tunisia.
Imikino ya shampiyona zose abanyarwanda bakina izagaruka mu mpera z’iki cyumweru ukuyemo iya Libya ikinamo Djihad Bizimana, Manzi Thierry, na Patrick Sibomana. Kuko bo bari mu kiruhuko nyuma yo gusoza umwaka w’imikino.