Gusoma ni igikorwa gikomeye cyatangiye kwitabwaho cyane n’ababyeyi n’abarezi. Abahanga mu mikurire y’abana bemeza ko umwana ashobora gusomerwa akimara kugira amezi 10. Ijwi ry’umubyeyi rifasha ubwonko bw’umwana gukura neza. Amafoto ari mu bitabo yongera ubushobozi bwo gutekereza no gufata mu mutwe. Iyo umwana yumvise amagambo menshi atandukanye, bituma yitegura kuvuga no gusoma vuba. Gusoma kare rero ni intambwe ikomeye iganisha ku mikurire myiza.
Gusoma bifasha abana kumenya amagambo menshi atandukanye. Iyo ababyeyi babasomera kenshi, bakura bavuga neza kandi basobanutse. Umwana wumva amagambo menshi asobanukirwa uko bayakoresha mu mibereho ya buri munsi. Ibi bituma ashobora gusobanura ibitekerezo bye neza. Iyo abasha kuvuga ibisonutse, bimuha icyizere mu baturage no mu ishuri. Kuvuga neza ni intwaro ikomeye mu buzima.
Ubushakashatsi bwerekana ko gusoma bifasha ubwonko gutekereza neza. Bifasha abana gufata mu mutwe, gukemura ibibazo, no kumva cyane. Iyo umwana amenyereye gusoma, abasha gukurikirana ibintu neza no gufata umwanzuro uhamye. Gukora ibi ni ingenzi mu myigire ye. Abana bamenyereye gusoma biba byoroshye kwiga amasomo yandi. Ibyo byose bitangira ku bitabo bisomeka buri munsi
Gusomera abana bibatoza kwita ku kintu kimwe igihe kirekire. Iyo bumva inkuru itangira ikagira iherezo, bibigisha kwihangana no gukurikira neza. Bitoza kudakurikira ibintu byinshi icyarimwe, ahubwo bagahugira ku kintu kimwe. Ibi bibafasha no mu masomo, cyane cyane igihe barimo kwiga amasomo asaba gutekereza. Iyo umwana afite ubushobozi bwo kwibanda ku kintu kimwe, akurana ubushishozi. Gusoma rero ni isoko y’ubwenge n’ubushobozi bwo kwihangana.
Gusoma hamwe n’umwana bituma habaho urukundo n’umubano wihariye. Iyo mwicaye hamwe mugasoma, aba yumva afite umutekano kandi akumva akunzwe. Ibi bimufasha gukura afite icyizere no gukunda abo bari kumwe. Gushyira umwana mu gituza ukamusomera bituma yumva yitaweho. Uko mubyishimira, niko bigenda bimwubaka mu buryo bw’umutima n’imibanire. Umubano w’abana n’ababyeyi uhera mu bikorwa byoroheje nk’ibi.
Gusomera umwana bituma yiga kuvuga no gusobanura. Iyo muganira ku nkuru musomye, umwana yiga gusubiza no gutanga ibitekerezo bye. Bimufasha kwiga gutega amatwi no gusobanura amarangamutima ye. Uko mugenda mubaza ibibazo ku nkuru, niko yigira ku biganiro. Aho gukura yicecekeye, aba umwana ushobora kuganira no kwifatira ibyemezo. Ibi byose ni inyungu zituruka mu gusoma gakangura ubwenge.
Ibitekerezo bikubiye mu bitabo bitandukanye bituma umwana amenya ibihe bitandukanye n’abantu batandukanye. Ibi bimuha amahirwe yo kwishyira mu mwanya w’abandi no kumva amarangamutima yabo. Akurana umutima w’impuhwe no kumenya kubana n’abandi. Ibitabo bigaragaza uburyo bwo gukemura amakimbirane n’ubutabera. Umwana watojwe gusoma akiri muto, akurana imyitwarire myiza. Buri gitabo kiba nk’ishuri rimwigisha indangagaciro z’ubuzima.
Ni ngombwa guhitamo ibitabo bijyanye n’imyaka y’umwana. Abana bato bakunda ibitabo birimo amabara menshi n’amagambo make. Abari mu myaka 2–4 bakunda imivugo, inyamaswa n’inkuru z’ibyo babona buri munsi. Abari hejuru ya 5 bakunda inkuru zifite ubutumwa bwinshi n’imigani. Ni byiza gusoma buri munsi nk’ isaha imwe, kuko bifasha gushyira umwana ku murongo. Gusoma bikwiye kuba igice cy’imibereho yabo ya buri munsi.
Nubwo hari imbogamizi, hari n’uburyo bwinshi bwo kuzirenga. Abana batihangana bashobora gusomerwa ibitabo bigufi kandi byigisha. Guhindura amajwi cyangwa gukina iyo nkuru bigira uruhare runini. Abataramenya gusoma bashobora guhitirwamo ibitabo bagendeye ku bintu bakunda. Mu ngo zivuga indimi z’amahanga, gusoma mu ndimi zitandukanye bifasha umwana kwiga indimi neza. Nta kabuza, gushishikariza umwana gusoma akiri muto ni ishingiro ry’ubushobozi bwose umwana akenera mu buzima.